Keppnin er ekki eingöngu ætluð þeim sem hafa reynslu af forritun fyrir heldur er hún fyrir alla framhaldsskólanema, jafnt þá sem hafa lært forritun sem og aðra. Við hvetjum því alla til að koma og prófa.

Keppninni er skipt í þrjár deildir eftir erfiðleikastigi:

Í hverju liði mega vera þrír keppendur. Lið velja sér eina deild/erfiðleikastig. 

Erfiðleikastig: 

• Delta: Ætlað byrjendum eða þeim sem eru rétt farnir að kynnast forritun. Æskileg kunnátta er einföld strengjavinnsla, inntak, úttak, if setningar og einfaldar lykkjur. 
• Beta: Millistig sem er ætlað til að brúa bilið á milli Delta og Alpha. Hér má búast við dæmum sem þarfnast flóknari útfærslu en í Delta, t.d. faldaðar lykkjur (e. nested loops),  flóknari strengjavinnsla og einföld reiknirit.
• Alfa: Ætlað þeim sem hafa mikinn áhuga á forritun og skara fram úr. Bestu þátttakendum úr þessari deild verður boðið að taka þátt í æfingabúðum með því markmiði að velja í ólympíulið Íslands í forritun. 

Forritunarmál 

Hvert lið velur hvaða forritunarmál það vill vinna í. Forritunarmál geta t.d. verið: Java, C++, C# eða Python en hægt er að sjá öll forritunarmál sem eru í boði á þessum hlekk. 

Hvað má - og hvað má ekki?

• Keppendur, dómarar og aðstoðarfólk mega vera í stofum á meðan keppnin stendur yfir.
• Dómarar og aðstoðarfólk mega vera í stofum á meðan hádegishlé stendur yfir.
• Öðrum er óheimilt að vera í stofunum nema í fylgd yfirdómara.
• Keppendur mega tala innan eigin liðs og við dómara og aðstoðarfólk á meðan keppnin stendur yfir.
• Í hádegishléinu er keppendum leyfilegt að tala við aðra, en ekki um verkefnin.
• Til dæmis má ekki hringja í aðra manneskju eða senda spurningar á spjallborði, samfélagsmiðlum eða öðrum samskiptaforritum þar sem önnur manneskja getur svarað spurningunni.
• Ef það er einhver spurning sem keppandi vill spyrja varðandi keppnina á meðan hún stendur yfir, skal spyrja í gegnum Clarifications á Kattis eða tala við dómara í stofunni.
• Hver meðlimur liðs má vera með eina tölvu og hámark einn skjá.
• Fartölvuskjár telst sem skjár.
• Það má koma með utanáliggjandi lyklaborð og auka mús við fartölvu.
• Það má koma með heyrnartól.
• Það má koma með vasareikni.
• Keppendur skulu tryggja að þeir séu ekki að trufla aðra keppendur með óþarfa hávaða, til dæmis úr tölvunni sinni, hávær vélræn lyklaborð eða með því að tala of hátt.
• Óheimilt er að nota síma, snjallúr, í keppninni.
• Setja skal síma, snjallúr og önnur stafræn tæki í töskuna sína.
• Ekki má nota stórt mállíkan (LLM) í keppninni til að leysa verkefnin. Dæmi um LLM eru ChatGPT, Gemini, LLama, Claude, Grok, Copilot, Tabnine, og fleiri.
• Það má leita á netinu.
• Það má koma með bækur.
• Það má koma með forskrifaðan kóða.
• Það má ekki taka mat með í stofurnar.
• Það má vera með drykki í lokuðu íláti.
• Passa að ganga snyrtilega um stofuna.
• Hver keppandi þarf að vera skráður í íslenskan framhaldsskóla á sama skólaári og keppnin er haldin. Vafamál má ræða við dómara og undanþága gæti verið veitt.
• Hámark 3 keppendur í liði. Sterklega mælt með 2-3 manna liðum.
• Liðsnöfn mega mest innihalda 32 stafi vegna prentun á boli og stigatöflu.
• Nöfn verða ritskoðuð af HR.