María Rún Bjarnadóttir gengur til liðs við lagadeild HR

María Rún Bjarnadóttir hefur gengið til liðs við lagadeild HR þar sem hún mun leiða enn aukna áherslu deildarinnar á rannsóknir og kennslu á sviði tækniréttar og stafrænna lagalegra álitaefna.  Doktorsritgerð hennar ber heitið; Does the Internet Limit Human Rights Protection? Sexual Privacy and the Limits of the Law. María Rún hefur sérhæft sig á mörkum mannréttinda- og tækniréttar og unnið ötullega að baráttu gegn stafrænu ofbeldi, sérstaklega í garð stúlkna og kvenna.

María Rún starfaði hjá embætti ríkislögreglustjóra frá árinu 2021 og hóf þá störf sem verkefnisstjóri stafræns ofbeldis, en var síðan forstöðumaður Mennta- og starfsþróunarseturs lögreglunnar og nýsköpunar- og stefnumótunarstjóri áður en hún tók við stöðu yfirlögfræðings og staðgengils ríkislögreglustjóra. Þar stýrði hún meðal annars þróun nýrrar tilkynningagáttar um netglæpi hjá lögreglu og vann að innleiðingu gervigreindar í starfsemi embættisins.  

María Rún lauk doktorsprófi frá lagadeild Sussex háskóla árið 2021, meistaraprófi frá lagadeild Háskóla Íslands árið 2008 og BA í lögfræði frá HÍ árið 2006. Hún hefur tekið þátt í rannsóknum, jafnt hérlendis sem erlendis, er snúa að áhrifum tækni á lýðræðislega innviði og tekið að sér ráðgjafahlutverk fyrir viðskipta-, dómsmála- og forsætisráðuneytin. Hún hefur til að mynda unnið að málatilbúnaði fyrir íslensk stjórnvöld fyrir Mannréttindadómstól Evrópu, skrifaði frumvarp sem varð að lögum um kynferðislega friðhelgi  og leiddi sendinefnd Íslands í samningaviðræðum um nýjan samning Sameinuðu þjóðanna um netbrot.  

Þá hefur María Rún flutt fjölda fyrirlestra og haldið námskeið á sínum ferli, heima og heiman. Þar má nefna fyrirlesturinn Gendered Online Abuse: Responses and Remedies á Kvennanefndarfundi Sameinuðu þjóðanna árið 2023, erindi hjá Chatham House í London undir yfirskriftinni Understanding the Cybercrime Economy sama ár og námskeið um stafrænt ofbeldi fyrir dómara og saksóknara í Moldóvu í febrúar 2024. 

María situr í Grevio nefnd Evrópuráðsins sem hefur eftirlit með framkvæmd Istanbúl samningsins um ofbeldi gegn konum og heimilisofbeldi, á sæti í landsnefnd UN Women á Íslandi og er varaformaður Lögfræðingafélags Íslands.