Að bæta færni, sjálfstæði og seiglu á efri árum
Mikel Izquierdo er prófessor við Háskólann í Navarra og leiðir alþjóðleg rannsóknaverkefni í samstarfi við Evrópusambandið og Alþjóðaheilbrigðismálastofnunina (WHO). Hann var aðalfyrirlesari á Vöðvaverndardeginum sem haldinn var nýverið í Opna háskólanum í samstarfi við íþróttafræðideild HR.
Á Vöðvaverndardeginum í ár var sjónum beint að kerfisorsökuðu færnitapi, þeim afleiðingum sem hvað minnst hefur verið rætt í tengslum við vöðvarýrnun. Kerfisorsakað færnitap er þegar skipulag og ferlar innan heilbrigðiskerfisins stuðla að því að einstaklingar tapa styrk, færni og sjálfstæði, jafnvel á meðan þeir eru í meðferð.
Mikel hefur m.a. unnið með Ólympíumeisturum og alþjóðlegum afreksliðum, þar á meðal Liverpool og Barcelona. Undanfarin ár hefur hann einblínt á rannsóknir á eldra fólki út frá því að margir, eldri einstaklingar missa ekki sjálfstæði eingöngu vegna sjúkdóms heldur jafnframt vegna þess að um leið tapi þeir styrk, krafti, jafnvægi og sjálfstrausti.
Fyrir íþróttamann getur aukinn styrkur, eða kraftur, ráðið úrslitum um medalíu eða sigur. Fyrir eldri einstakling getur það ráðið því hvort hann getur staðið upp úr stól, gengið upp stiga, forðast fall, náð sér eftir sjúkrahúsdvöl eða haldið áfram að búa heima.
Segir Mikel og bætir við að þegar hreyfing sé rétt útfærð sé hún meðferðartæki sem geti hjálpað fólki við að endurheimta getu, verndað sjálfstæði þeirra og aukið seiglu. Þetta hafi orðið til þess að kveikja áhuga hans á núverandi rannsóknarsviði og hvetji hann áfram í þeim rannsóknum.
Að bæta færni, sjálfstæði og seiglu á efri árum
Hann segist vonast til að með fyrirlestrinum hafi hann náð að miðla þeim skilaboðum til Íslendinga að það að eldast snúist ekki eingöngu um að lifa lengur heldur einnig um að viðhalda líkamlegri getu til að halda áfram að gera það sem skiptir fólk máli.
Hér á Íslandi, líkt og í mörgum örum löndum, standið þið frammi fyrir þeirri áskorun að fólk verður síefellt eldra. Þá er spurningin er ekki aðeins sú hvernig bæta megi árum við lífið, heldur hvernig bæta megi færni, sjálfstæði og seiglu við þessi ár. Það krefst breytinga á því hvernig við hugsum um hreyfingu fyrir eldra fólk. Mín skilaboð eru þau að styrktarþjálfun og fjölþætt þjálfun eigi ekki að vera valkvæð eða aukaatriði heldur hluti af reglubundnum forvörnum og meðferð. Við þurfum að mæla færni, greina áhættu snemma, ávísa hreyfingu á réttan hátt og skapa leiðir þannig að eldra fólk fái viðeigandi þjálfun með réttu eftirliti.
Segir Mikel og bætir við að lokum að með rannsóknum sínum vilji hann sýna fram á það á raunhæfan og bjartsýnan hátt að hægt sé að innleiða úrræði fyrir eldra fólk sem viðhaldi sjálfstæði þeirra og seiglu.
Dagsetning
Deila