Aðrir stjórnendur

Aðstoðarrektor náms, nemenda og sjálfbærni ber ábyrgð á heildarstefnu HR í málaflokkum sem varða nám, kennslu, nemendaþjónustu og sjálfbærni.

Aðstoðarrektor hefur það hlutverk að tryggja gæði náms og kennslu við HR og að námsumhverfi skólans sé framúrskarandi. Í þessu felst meðal annars að skapa náms- og starfsumhverfi sem ýtir undir sköpunarkraft, fagmennsku og samstarf og að nemendur njóti fyrsta flokks þjónustu og stuðnings í gegnum allt sitt nám.

Undir aðstoðarrektor heyrir Kennsluþróun HR, sem sinnir þróun kennsluhátta, gæðamálum náms og kennslu og stuðningi við kennara í nýjum kennslu- og námsmatsaðferðum. Aðstoðarrektor vinnur náið með námsráði skólans og er formaður sjálfbærninefndar HR, þar sem hún stýrir samþættingu á sjálfbærni við alla starfsemi háskólans; í kennslu, rannsóknum og rekstri. Aðstoðarrektor hefur jafnframt yfirumsjón með háskólagrunni HR og vinnur að því að tryggja að nemendur fái bæði sterkan fræðilegan grunn og félagslegan stuðning við inngöngu í háskólasamfélagið.

Með aðstoðarrektor vinna sérfræðingar á háskólaskrifstofu er sinna framangreindum málefnum. Rektor getur veitt aðstoðarrektor frekari ábyrgð og verkefni. 

Aðstoðarrektor rannsókna, nýsköpunar og atvinnulífstengsla ber ábyrgð á stefnumótun, þróun og  framkvæmd stefnu HR í málefnum sem tengjast rannsóknum, nýsköpun og samstarfi við atvinnulíf, og hefur eftirlit með gæðum og árangri málaflokksins.

Aðstoðarrektor hefur það meginhlutverk að efla rannsóknastarf innan háskólans, tryggja gæði og faglega forystu í vísindalegri starfsemi og stuðla að aukinni nýsköpun og hagnýtingu þekkingar í samfélaginu.

Undir aðstoðarrektor heyrir rannsóknaþjónusta HR, sem veitir aðstoð og ráðgjöf vegna umsókna um rannsóknarstyrki, styrkir rannsóknarsamstarf og styður við stjórnsýslu rannsókna. Aðstoðarrektor vinnur náið með rannsóknaráði HR og er formaður nýsköpunarnefnd HR.

Aðstoðarrektor hefur jafnframt frumkvæði að því að efla tengsl HR við innlent og erlent atvinnulíf, stuðla að gagnvirku samstarfi milli háskóla og atvinnulífs og  að rannsóknir og þróunarverkefni HR nýtist samfélaginu með áþreifanlegum hætti.

Með aðstoðarrektor vinna sérfræðingar á háskólaskrifstofu er sinna framangreindum málefnum. Rektor getur veitt aðstoðarrektor frekari ábyrgð og verkefni.