FLIKK fær áframhaldandi styrk

„Það skiptir sköpum að fá þennan styrk og geta þannig haldið áfram að valdefla foreldra kvíðinna barna,“ segir dr. Brynjar Halldórsson, dósent við sálfræðideild HR og forsvarsmaður FLIKK; foreldramiðaðrar internetlausnar fyrir kvíðna krakka. Heilbrigðisráðherra samþykkti nýverið að tryggja verkefninu áframhaldandi styrk til að standa undir stöðugildum fagfólks innan þess og styrkja innleiðingu enn frekar. 

Brynjar, ásamt dr. Önnu Sigríði Islind, dr. Hafrúnu Kristjánsdóttur og dr. Steinunni Gróu Sigurðardóttur, hefur leitt þróun og framkvæmd úrræðisins. Þuríður Hallgrímsdóttir Viðar, verkefnastjóri og doktorsnemi við sálfræðideild, hefur einnig tekið virkan þátt í þróun FLIKKS og þjálfun meðferðaraðila. 

„FLIKK snýst í stuttu máli um að þjálfa foreldra í að veita börnum með kvíða viðurkennda meðferð án þess að þurfa að mæta á heilsugæsluna eða til sálfræðings eða lenda á löngum biðlista,“ segir Brynjar og bendir á að löng bið eftir úrlausn auki á streitu bæði hjá foreldrum og  börnum og geti valdið því að foreldrar upplifi bjargarleysi gagnvart vandanum.

„Tíminn frá því að fólk sækir um úrræðið, sem er gert alveg milliliðalaust og án beiðni, þar til meðferðin getur hafist er mun styttri en bið eftir hefðbundinni einstaklingsmeðferð. Foreldrar geta farið í gegnum meðferðarefnið hvenær sem hentar. Í stað þess að þurfa að fara úr vinnu til að hitta fagaðila geta foreldrar nú lesið sér til um kvíðavanda barna og lært hjálplegar aðferðir þegar þeim hentar, til dæmis á kvöldin þegar börnin eru komin í ró, “ segir Brynjar og leggur áherslu á að snemmtækt inngrip þegar kemur að kvíðavanda barna geti skipt sköpum.

Síðustu ár hafa fréttir af löngum biðlistum verið áberandi í fjölmiðlum, stöðugt fleiri börn þurfa inngrip vegna kvíða og foreldrar upplifa að kerfið sé að bregðast. Löng bið eftir úrræði getur valdið því að vandinn stigmagnast og erfiðara reynist að ná tökum á honum. FLIKK gefur foreldrum tækifæri til þess að hjálpa börnum sínum að ná tökum á hamlandi kvíða og ná bata. 

Þetta er í fyrsta skipti á heimsvísu sem veittur er aðgangur að slíku kerfi innan opinbers heilbrigðiskerfis. FLIKK byggir á meðferð sem er í notkun í Bretlandi og hefur árangur mælst góður.

Áður hefur verið greint frá því að Wellcome Trust veitti Háskólanum í Oxford styrk upp á 7 milljónir punda, um 1,2 milljarða króna, til að koma FLIKK í notkun í Chile, Filippseyjum, Tælandi, Japan og Pakistan.  Rannsakendum við HR hefur verið falin veigamikil aðkoma að því verkefni sem snýr að innleiðingu og þýðingu. „Þetta er ótrúlega mikilvægt og spennandi verkefni sem er nú að fara af stað. Geðheilbrigðisþjónusta fyrir börn á þessum stöðum hefur ekki verið góð og það er heiður að fá að taka þátt í að styrkja þennan þátt,“ segir Brynjar.

Hvernig virkar FLIKK?

Ekki þarf barn að hafa verið greint af fagaðila með kvíða áður en sótt er um meðferðina heldur er nóg að foreldra gruni að kvíði sé að valda barninu ama. 

Nokkur einkenni kvíða barna:

• Vill ekki fara í skólann 
• Erfitt með að slíta sig frá foreldri 
• Óhóflegar áhyggjur 
• Vandi í tengslum við svefn 
• Talar um að vera illt í maganum eða höfðinu án þess að það sé augljós ástæða 
• Grátur  
• Viðvarandi vanlíðan 
• Vandi í tengslum við vini 
• Forðast að fara út 
• Forðast tómstundir 
• Hræðsla við að gera nýja hluti
• Þörf fyrir stöðuga hughreystingu

FLIKK - skref fyrir skref 

Áttu barn á aldrinum 5-12 ára sem þig grunar að eigi við kvíðavanda að stríða?

• Farðu á skraning.flikk.is. Þar lestu upplýst samþykki og svarar grunnupplýsingum.
• Í kjölfarið færðu sendan hlekk með spurningalista sem metur kvíðaeinkenni barnsins.
• Ef kvíðaeinkennin mælast yfir viðmiðum hringir sálfræðingur í þig til þess að tryggja að meðferðin sé viðeigandi fyrir viðkomandi barn. (Ef barnið mælist undir viðmiðum samkvæmt spurningalistanum er samt hægt að óska eftir samtali við sálfræðing til þess að fara yfir stöðuna.)
• Þú færð aðgang að flikk.is og getur hafið meðferðina sem er í 7 hlutum.
• Hver meðferðarhluti felur í sér að foreldri les eða hlustar á fræðsluefni um kvíða. Í fyrstu er lögð áhersla á að foreldri læri hvað kvíði er og hvað viðheldur honum. Foreldrum eru í kjölfarið kenndar aðferðir til að bregðast við kvíðavandanum á nýjan máta. Markmiðið er að barnið læri að takast á við það sem það óttast, skref fyrir skref.
• Eftir hvern meðferðarhluta þarf foreldri eða forráðamaður að svara spurningalista til að ljúka hlutanum. Sálfræðingur fylgist með framgangi meðferðarinnar og hefur samband við foreldri einu sinni í viku í gegnum síma til að tryggja að meðferðin gangi vel og sé að gefa árangur. Þá gefst foreldrum einnig tækifæri til þess að spyrja nánar út í meðferðarefnið.