HR og Hagstofa Íslands í samstarf á sviði rannsókna

Háskólinn í Reykjavík og Hagstofa Íslands hafa undirritað samkomulag um aðgang nemenda í framhaldsnámi að aðstöðu, gögnum og aðstoð sérfræðinga stofnunarinnar við vinnu að lokaverkefnum þeirra.

Markmið samkomulagsins er að auka samstarf Hagstofunnar og HR á sviði rannsókna, og felur það í sér að nemendum í framhaldsnámi í HR eru veitt tækifæri til að vinna lokaverkefni, meistararitgerðir, doktorsritgerðir eða stakar greinar (sem eru hluti af doktosritgerð) í samstarfi við Hagstofuna.

Með samkomulaginu er metnaðarfullum nemendum gert kleift að vinna að mikilvægum aðferðafræðilegum eða rannsóknartengdum verkefnum á íslensku samfélagi og þannig auka við þekkingu sína og færni við meðferð gagna og reynslu sína af rannsóknarvinnu. Á sama tíma gerir samkomulagið Hagstofunni kleift að auka gæði sinna gagna með því að fá til liðs við sig metnaðarfulla nemendur til að sinna afmörkuðum verkefnum.