Þann 14. október næstkomandi klukkan 13.00 fer fram málþing í Norræna húsinu, um ávinning og áskoranir evrópsku háskólanetanna fyrir nemendur, starfsfólk, stöðu háskólanna og samfélagið. Innan Evrópu er nú lögð rík áhersla á dýpra samstarf háskóla en áður hefur þekkst með fjármögnun evrópskra háskólaneta.

Fjórir íslenskir háskólar eru hver um sig í einu af 65 háskólanetum í Evrópu. Háskólarnir boða til málþings um ávinning og áskoranir háskólanetanna fyrir nemendur, starfsfólk, stöðu háskólanna og samfélagið. Málþingið er haldið í samstarfi við Landskrifstofu Erasmus+ á Íslandi og menningar-, nýsköpunar- og háskólaráðuneytið.

Netin eiga að styðja við nýsköpun í kennslu og rannsóknum til að mæta örum samfélagsbreytingum og fjölþættum áskorunum nútímans. Háskólum í netum er þannig ætlað að ýta undir bæði sjálfbæra þróun til framtíðar og samkeppnishæfni Evrópu.

Háskólinn í Reykjavík er þátttakandi í NeurotechEU háskólanetinu. Það er hluti af verkefni Evrópusambandsins og Erasmus+ sem snýr að evrópskum háskólum og kallast European University Initiative.

Dr. Ragnhildur Helgadóttir, rektor Háskólans í Reykjavík, og Bryndís Björk Ásgeirsdóttir, sviðsforseti samfélagssviðs, munu taka þátt í pallborðum fyrir hönd HR en viðburðurinn er opin öllum.

Þátttaka í viðamiklu háskólaneti á borð við NeurotechEU felur í sér mikil tækifæri fyrir HR enda um stórt og stefnumótandi samstarf að ræða. Í samstarfsnetinu felast meðal annars tækifæri til að móta og þróa kennsluaðferðir framtíðarinnar, fjölmörg rannsóknartækifæri fyrir vísindafólk og doktorsnema skólans auk þess sem nemendur HR fá aukin tækifæri á skiptinámi og starfsnámi hjá samstarfsaðilum.

Nánari upplýsingar um málþingið og skráning fer fram hér

Hér má sjá myndband þar sem þau Þorbjörn Rami Aaro Joukhi, nemandi í tölvunarfræði, og Guðlaug Matthildur Jakobsdóttir, forstöðukona alþjóðasviðs, ræða sína upplifun af þátttöku í NeurotechEU samstarfsnetinu.