Mjög jákvæð viðurkenning sem endurspeglar öflugt vísindastarf við skólann
Alls eru átta manns úr röðum vísindafólks Háskólans í Reykjavík á lista Research.com yfir fremsta vísindafólk á sínu sviði fyrir árið 2026. Þess ber að geta sérstaklega að Dr. Susanne Durst, prófessor við viðskipta- og hagfræðideild Háskólans í Reykjavík, er númer eitt á Íslandi yfir fremsta vísindafólk í heimi í viðskiptafræði og stjórnun, annað árið í röð.
Heildarfjöldi allra birtinga fremstu fræðimanna við HR er 2.383, eða að meðaltali 298 birtingar á hvern vísindamann. Þá er heildarfjöldi tilvitnana í verk þessara fræðimanna 226.576, eða að meðaltali 28.322 tilvitnanir á hvern rannsakand
Á vefsíðu Research.com er gögnum um vísindastarf safnað saman og listar birtir yfir áhrifamestu vísindamenn heims á mismunandi fræðasviðum. Að komast á lista er viðurkenning sem byggir á mælikvörðum á borð við h-vísitölu, tilvitnanir og fjölda birtinga. Slík viðurkenning endurspeglar virkni og áhrif rannsókna viðkomandi fræðimanns og eykur alþjóðlegan sýnileika hans.
Það er frábært að sjá að átta rannsakendur frá Háskólanum í Reykjavík eru á lista yfir framúrskarandi vísindafólk árið 2026. Þetta er mjög jákvæð viðurkenning sem endurspeglar öflugt vísindastarf við skólann. Orðstír og traust til skólans vex þegar svona gleðifréttir birtast. Þessir rannsakendur hafa skilað verulegu framlagi til vísindanna, hvert á sínu sviði, og aðrir rannsakendur styðjast við og vísa til verka þeirra í miklum mæli. Við samgleðjumst og óskum þeim innilega til hamingju,
segir Sigríður Lára Guðmundsdóttir, forstöðumaður hjá rannsóknaþjónustu HR.
Eftirfarandi vísindafólk HR var á lista yfir fremsta vísindafólk heims árið 2026:
Á sviði viðskipta og stjórnunar
Dr. Susanne Durst, prófessor í stjórnun við viðskipta- og hagfræðideild með 6. 624 tilvitnanir og 164 útgefnar greinar. Sérsvið Susanne eru meðal annars þekkingar- og áhættustjórnun, stjórnun og nýsköpun, sjálfbær viðskiptaþróun og ábyrg stafræn umbreyting, sérstaklega hjá minni sprotafyrirtækjum.
Susanne hefur leitt alþjóðleg rannsóknarverkefni og hefur hún hlotið margvíslegar viðurkenningar fyrir rannsóknir sínar, þar á meðal Emerald Literati-verðlaunin fyrir Outstanding Paper árið 2020 og 2023. Þetta er annað árið í röð sem hún er númer eitt á Íslandi yfir fremsta vísindafólk í heimi í viðskiptafræði og stjórnun.
Á sviði félags- og hugvísinda
Inga Dóra Sigfúsdóttir, prófessor við sálfræðideild með 131.177 tilvísanir og 188 útgefnar greinar. Inga Dóra er einnig rannsóknarprófessor við Columbia-háskóla í New York og gestaprófessor við Karolinsku-stofnunina í Stokkhólmi. Þá er hún stofnandi og stjórnandi vísindastarfs hjá rannsóknamiðstöðinni Rannsóknir & greining.
Á sviði erfðafræði
Bjarni V. Halldórsson, dósent við verkfræðideild, með 24.052 tilvitnanir og 162 útgefnar greinar.
Rannsóknarsvið Bjarna er fyrst og fremst innan lífefnafræði, erfðafræði og sameindalíffræði, með sérstakri áherslu á erfðafræði og sameindalíffræði. Rannsóknir hans ná einnig inn á svið læknisfræðinnar og þá m.a. ónæmisfræði, krabbameinsrannsókna og skurðlækninga.
Á sviði verkfræði- og tækni
Slawomir Koziel, prófessor við verkfræðideild, með 20.614 tilvitnanir og 1.179 útgefnar greinar.
Sérsvið hans er tölvustudd hönnun og líkanagerð loftneta og örbylgjurása, hermunardrifin hönnun, hagræðing byggða á staðgengilslíkönum, vélrænt nám, djúpnám og gervigreind. Verk hans ná yfir fræði, þróun reiknirita og verkfræðileg notkunarsvið í fjölbreyttum greinum, þar á meðal hátíðnihönnun, flug- og geimverkfræði, óeyðileggjandi prófanir, læknisfræðilega myndgreiningu og fleira. Hann hefur birt yfir 30 bókarkafla og meira en 1.300 ritrýndar vísindagreinar.
Á sviði tölvuvísinda
Magnús M. Halldórsson, prófessor við tölvunarfræðideild, 8.737 tilvitnanir og 287 útgefnar greinar.
Sérsvið Magnúsar Más er fræðileg tölvunarfræði en hann er forstöðumaður Þekkingarseturs í fræðilegri tölvunarfræði (ICE-TCS) við tölvunarfræðideild Háskólans í Reykjavík sem heldur úti öflugum rannsóknum og reglulegum viðburðum. Rannsóknir hans spanna nokkur lykilsvið innan reiknifræði og stærðfræði, auk tölvuneta, gervigreindar og rafmagnsverkfræði.
Luca Aceto, prófessor við tölvunarfræðideild, 5.184 tilvitnanir og 346 greinar. Rannsóknir hans eru á sviði fræðilegrar tölvunarfræði, þar á meðal má telja athuganir á rökfræði tölvunarfræðinnar, merkingafræði forritunaraðgerða (e. structural operational semantics) og samtímavinnslu í tölvuforritum (e. concurrency theory), sem meðal annars fjallar um hvernig skilgreina eigi forritunarkóða þannig að leysa megi verkefni á skilvirkari hátt með því að nýta marga örgjörva.
Á sviði viðskipta- og hagfræði
Ender Demir, prófessor við viðskipta- og hagfræðideild, með 8.498 tilvitnanir og 166 útgefnar greinar.
Helstu rannsóknarefni hans eru m.a. markaðsdýnamík og sveiflur, áhrif COVID-19 heimsfaraldursins, fjármálamarkaðir og fjárfestingaaðferðir, orka, umhverfi og hagvöxtur, notkun og öryggi blockchain-tækni, stöðugleiki banka, reglusetning og skilvirkni, auk fyrirtækjafjármála og stjórnarhátta.
Á sviði sálfræði
Jack E. James, prófessor við sálfræðideild , með 6.003 tilvitnanir og 129 útgefnar greinar.
Hann hefur lagt til fjölmargar vísindagreinar, aðallega á sviði læknisfræði. Rannsóknir hans ná m.a. til lyfjafræði, vatnalíffræði, lífeðlisfræði, ónæmisfræði og almennrar heilbrigðisfræði.
Dagsetning
Deila