Seta Íslands í mannréttindaráði SÞ rædd á málstofu lagadeildar

Um miðjan febrúar fór fram málstofa á vegum lagadeildar Háskólans í Reykjavík í tilefni þess að Ísland tók sæti í mannréttindaráði Sameinuðu þjóðanna þann 1. janúar sl. til þriggja ára.

Markmið Íslands með setu í mannréttindaráðinu er að standa vörð og efla samstöðu um mannréttindi á heimsvísu. Í aðdraganda kosninga til mannréttindaráðsins gáfu íslensk stjórnvöld út áheitaskjal með skuldbindingum um hvað Ísland ætlar að leggja áherslu á meðan á setu Íslands stendur. Helstu áherslumál Íslands verða efling mannréttinda um allan heim, mannréttindi kvenna og stúlkna, réttindi hinsegin fólks, réttindi barna, og tengsl umhverfismála og mannréttinda.

Á málstofunni var seta Íslands í mannréttindaráðinu 2025-2027 rædd, sérstaklega með tilliti til áherslumála stjórnvalda í ráðinu og stöðu alþjóðamála í dag.

Framsögur fluttu þau Þórdís Ingadóttir, prófessor og forstöðumaður Alþjóða- og Evrópuréttarstofnunar HR, Martin Eyjólfsson, ráðuneytisstjóri utanríkisráðuneytisins, og Einar Gunnarsson, sendiherra og fastafulltrúi Íslands í Genf.

Að loknum framsögum voru pallborðsumræður þar sem þátttakendur voru þau Björg Eva Erlendsdóttir, framkvæmdastjóri Landverndar, Eva Bjarnadóttir, teymisstjóri UNICEF, Kári Garðarsson, framkvæmdastjóri Samtakanna ´78, og Stella Samúelsdóttir, framkvæmdastýra UN Women Ísland.