Vissir þú að fyrsti forritarinn var kona? Hún hét Ada Lovelace!

Helstu upplýsingar

• Undanfari:  Enginn
• Aldur: 7 - 12 ára

Um námskeiðið

Á námskeiðinu verða kennd undirstöðuatriði í forritun og tækni samþætt sjálfsmyndarvinnu. Einkunnarorð námskeiðanna eru skemmtun, samstaða og styrkur.

Markmið þessara sérhönnuðu námskeiða er að útskrifa tæknistelpur með skýra og jákvæða sjálfsmynd og brennandi áhuga á forritun og tækni.

Reynslan hefur sýnt að forritunarkennsla eflir markvisst sjálfstraust stelpna og að stúlkur sem hafa lært forritun nota kunnáttuna á annan hátt en drengir. Stelpur á aldrinum 7-12 ára eru móttækilegar fyrir sjálfsmyndarvinnu og með markvissri kennslu má efla og byggja upp sjálfsmynd þeirra svo um munar. Þetta er mikilvægt sérstaklega í ljósi þess að rannsóknir sýna að sjálfsmynd stelpna hrakar mjög á unglingsárunum.

Notast verður við kubbaforritun við hönnun tölvuleikja. Stelpurnar búa til eigin leiki og læra með því að brjóta upp stór verkefni í smærri hluta, leysa úr vandamálum og vinna með öðrum að verkefnum. Þar að auki verða samvinnuæfingar í Minecraft með það að markmiði að þjappa hópnum saman og skapa góðan liðsanda.

Útinám og hreyfing
Nemendur taka þátt í forritunartengdum ratleik utandyra þar sem þeir leysa þrautir og fylgja vísbendingum sem tengjast kóðun og rökhugsun. Verkefnin fara fram í nærumhverfi Háskólans í Reykjavík og efla samvinnu, sköpun, hreyfingu og heilbrigða skjánotkun. Sumarnámskeiðið er jafnframt umfangsmeira en áður með nýjum og spennandi verkefnum.

Systkinaafsláttur
Við bjóðum 15% systkinaafslátt sem auðveldar fjölskyldum að skrá fleiri en eitt barn á námskeiðin.