Stafræn -

heilbrigðistækni

Í meistaranámi í stafrænni heilbrigðistækni (e. Digital Health) verða til leiðtogar framtíðarinnar í hönnun og þróun stafrænnar heilbrigðistækni. Þar að auki læra nemendur að vinna með gögn og læra að umgangast gervigreindarlausnir af heilindum. Í meistaranáminu er áhersla lögð á gagnrýna hugsun, siðferðislega rétta nálgun og gagnaheilindi. Stafrænar heilbrigðislausnir, svo sem smáforrit (e. app) og stafrænir vettvangar (e. digital platforms) fæðast einnig í gegnum námið og leggjum við áherslu í inntöku inn í námið, á það að taka inn fólk sem hefur tæknimenntun (tölvunarfræði eða verkfræði) annars vegar og fólk sem hefur heilbrigðismenntun (læknisfræði, hjúkrunarfræði, sálfræði eða þessháttar) hins vegar. Inntaka fer fram í gegnum viðtöl og hver árgangur er með um 15 nemendur. Nemendur okkar fá tækifæri á að þroskast og vaxa í gegnum námið og auðga sín áhugamál með valnámskeiðum, sem á víxl við skyldunámskeið dýpka skilning á viðfangsefninu.

Af hverju stafræn heilbrigðistækni?

Stafræn heilbrigðistækni er framtíðin. Það er sár vöntun á einstaklingum sem skilja bæði þarfir heilbrigðiskerfisins og hvað tæknilausnir hafa upp á að bjóða á og geta lagt hald á það hvenær tækninýjungar geta bætt ferla, greiningar, eftirfylgni og daglegt líf heilbrigðisstarfsfólks, sjúklinga og aðstandenda. Markmið námsins er að leiða saman fólk sem hefur nú þegar sérþekkingu á sínu sviði og hefur þá annaðhvort lokið heilbrigðismenntun eða tæknimenntun. Víxlverkun þeirra á milli mun gera það að verkum að hægt verður að leiða byltinguna sem þarf að verða til að við stöndum undir vaxandi fjölda fólks sem þarf á heilbrigðisþjónustu að halda í framtíðinni. Hugmyndin er því að styðja við heilbrigðiskerfið með gagnadrifinni nálgun og nýstárlegum stafrænum lausnum og er markmiðið að skapa slíka sérfræðinga með þessu námi.

Þetta nýja meistaranám er mikilvægt skref í að mennta framtíðarsérfræðinga á Íslandi, sem eru leiðandi í hönnun og þróun lausna í stafrænni heilbrigðistækni og með sérþekkingu á að nýta gögn úr heilbrigðiskerfinu. Tækifærin fyrir tækni í heilbrigðiskerfinu eru sannarlega til staðar. Til dæmis eru alls kyns ferlar sem mætti bæta með tækninýjungum og er þetta meistaranám einmitt fyrir einstaklinga sem hafa brennandi áhuga á að bæta heilbrigðiskerfið með nýstárlegri stafrænni og gagnastýrðri tækni.

Anna Sigríður Islind, dósent
við tölvunarfræðideild Háskólans í Reykjavík

MSc í stafrænni heilbrigðistækni er frábært val fyrir nemendur sem hafa áhuga á mótun heilbrigðislausna með nýjustu tækni og vilja hafa raunveruleg áhrif á þessu sviði. Með áherslu á hagnýta færni og raunhæfa notkun veitir námið nemendum þá þekkingu og reynslu sem þeir þurfa til að ná árangri á þessu spennandi og ört vaxandi sviði.

Rannsóknarsetur

Meistaranám þetta fellur undir og gefur inngöngu í tvö rannsóknarsetur; CISDAS eða Heilbrigðistæknisetur. CISDAS (Center for Information Systems and Data Science Research) er rannsóknarsetur sem vinnur sérstaklega með rannsóknir á sviði framsækinna tæknilausna sem hafa það að meginmarkmiði að bæta líf og líðan fólks með stafrænum og gagnadrifnum hætt. Innan setursins er sérstök áhersla lögð á stafrænar heilbrigðislausnir og gagnadrifna nálgun til að bæta ákvarðanatöku í heilbrigðiskerfi framtíðarinnar. Innan Heilbrigðistækniseturs er einblínt á þrívíddarprentun, sýndarveruleika og framsækna verkfræðilega nálgun á heilbrigðistækni.