Hönnunar -

og vörutæknifræði

Hagnýtt nám og tenging við atvinnulífið

Nám í hönnunar- og vörutæknifræði BSc á sér sterkar fyrirmyndir erlendis, t.d. í Skandinavíu en engin sambærileg námslína er kennd í grunnnámi á Íslandi. 

Námið nýtir grunn í tæknifræði sem er sérstaklega áhugverð nálgun þar sem það byggir á sterkum tæknilegum grunni í raungreinum og tæknilegum undirstöðum tæknifræðinnar. Þannig tengir námið saman tækni, vöruhönnun og vöruþróun þar sem sjálf varan er miðpunkturinn.  

Lögð er áhersla á teymisvinnu, virkt samstarf við atvinnulíf og starfsnám. Nemendur læra að hlusta, tengja og miðla hugmyndum og þróa þær áfram í samvinnu við hagaðila og sérfræðinga. Þannig fá þeir reynslu af raunverulegum verkefnum í nýsköpun og vöruþróun, læra að taka ábyrgð og sýna frumkvæði. 

Námið tengir saman tækni, hönnun og vöruþróun þar sem varan er viðfangsefnið.  

Tækniþátturinn er úr raungreinum og tæknilegum undirstöðum úr rafmagns- og véltæknifræði. Í þessum hluta eru einnig námskeið úr verkfræði (efnafræði) og tölvunarfræði (forritun). Þetta er forsenda fyrir því að námslínan fáist metin sem tæknifræðinám hjá VFÍ. Námskeið tengd vöruhönnun og vöruþróun eru ný.  

Á fyrsta ári er áhersla á raungreinar, tæknilegar undirstöður og vöruhönnun, og einnig innsýn í hugræna þætti og skynjun úr námskeiði í sálfræðideild. Fyrsta ári lýkur með hagnýtu verkefni (3v) með áherslu á vöruhönnun. 

Á öðru ári er áframhaldandi áhersla á hönnun og einnig á þátt vöruþróunar, þar sem nemendur kynnast aðferðarfræði vöruþróunar. Öðru ári lýkur með hönnunarverkefni (3v) þar sem áherslan er á vöruþróun, allt frá hugmynd og að lágmarksvöru (MVP). 

Á 5. önn hafa nemendur kost á að sækja skiptinám í samstarfi við skóla í Danmörku, Svíþjóð og í Finnlandi, og mögulega víðar. Fyrir erlenda nemendur sem hafa hug á skiptinámi og íslenska nemendur sem ekki komast frá í skiptinám er boðið upp á tvö námskeið innan námslínunnar sem kenndir eru á ensku og stórt 18 eininga hönnunar- og þróunarverkefni sem unnið er í hópum og í samstarfi við fyrirtæki og er einnig kennt á ensku.  

Íslenskir nemendur geta nýtt 5. önn í sérhæfingu (minor) þar sem hægt að leggja áherslu á sérsvið, t.d. hugbúnaðarvörur með vali á  námskeiðum í tölvunarfræði. Í raun geta nemendur sett saman sína eigin námsáætlun á önninni. 

Á 6. önn er starfsnám og sérhæfðari námskeið tengd tæknilegum útfærslum og hönnun. Á 3v tímabili 6. annar taka nemendur námskeiðið nýsköpun- og stofnun fyrirtækja í viðskipta- og hagfræðideild.  

Á 7. önn er áherslan á stórt lokaverkefni sem er einstaklingsverkefni þar sem nemendur velja sér viðfangsefni sem tengir saman alla þrjá meginþætti námsins: tækni, hönnun og vöruþróun. Í verkefninu þurfa nemendur að sýna fram á þá þekkingu, leikni og hæfni sem þeir hafa öðlast í náminu og vinna að lausn þar sem útkoman er áþreifanleg. Verkefnið getur verið sjálfskapað eða hagnýtt verkefni unnið í tengslum við fyrirtæki. 

Starfsnámið veitir forskot

Tæknifræðideild er með samninga við um 40 fyrirtæki og stofnanir. Margir nemendur hafa fengið tilboð um starf til lengri eða skemmri tíma í kjölfar starfsnáms og lokaverkefna sem unnin eru í samstarfi við fyrirtæki.

Með því að ljúka starfsnámi auka nemendur þekkingu sína á sínu fagsviði. Nemendur búa sig jafnframt undir störf að námi loknu.

Ávinningur af starfsnámi er margvíslegur. Markmið með starfsnámi er meðal annars að:

• Efla tengsl nemenda við atvinnulífið.
• Auka innsýn og skilning nemenda á viðfangsefnum viðkomandi fagsviðs.
• Að nemendur öðlist reynslu af því að vinna að úrlausn raunhæfra viðfangsefna á vettvangi, undir leiðsögn leiðbeinenda úr atvinnulífinu.
• Að nemendur beiti aðferðum tæknifræðinnar við lausn hagnýtra verkefna.
• Að nemendur geti unnið sjálfstætt og borið ábyrgð á eigin þekkingarleit og faglegum áherslum.
• Að nemendur tileinki sér sjálfstæð og markviss vinnubrögð við úrlausn raunhæfra hönnunar-, greiningar- og/eða rannsóknarverkefna á fagsviðinu.

Skiptinám

Á 5. önn hafa nemendur kost á að sækja skiptinám í samstarfi við skóla í Danmörku, Svíþjóð og í Finnlandi, og mögulega víðar. Fyrir erlenda nemendur sem hafa hug á skiptinámi og íslenska nemendur sem ekki komast frá í skiptinám er boðið upp á tvö námskeið innan námslínunnar sem kenndir eru á ensku og stórt 18 eininga hönnunar- og þróunarverkefni sem unnið er í hópum og í samstarfi við fyrirtæki og er einnig kennt á ensku. Nemendur í BSc-námi þurfa að vera með 7 eða yfir í meðaleinkunn og búnir með 60 einingar þegar farið er í skiptinámið. Alþjóðaskrifstofa veitir frekari upplýsingar um hvert hægt er að fara í skiptinám.

CDIO-samstarfsnetið

Tæknifræðideild er aðili að samstarfsneti um að þróa og bæta kennslu í tæknifræði, CDIO (Conceive, Design, Implement, Operate). Í dag eru um 100 háskólar frá öllum heimshornum þátttakendur og vinna skólarnir kerfisbundið að því að þróa námsbrautir í tæknifræði og verkfræði með áherslu á þarfir atvinnulífsins.

Í tæknifræði við HR er færni í hugmyndavinnu, verkefnastjórnun, samskiptum og kynningum þjálfuð í ýmsum námskeiðum gegnum allt námið.

Í CDIO-aðferðafræðinni er lögð áhersla á samráð háskóla og atvinnulífs og fagfélaga. Mótun námsbrauta í anda CDIO á að tryggja að nemendur fái lausnamiðaða tæknilega færni sem vinnuveitendur sækjast eftir, án þess að slegið sé af fræðilegum kröfum.

Lesa meira um CDIO - Conceive, Design, Implement, Operate.

Tölvur í náminu

Nauðsynlegt að hafa góða tölvu í tæknifræðináminu. Mörg forrit sem eru notuð eru eingöngu til fyrir Windows stýrikerfi en ef nemendur eiga eða kjósa frekar notast við Apple tölvur er mikilvægt að þær séu nógu öflugar til að keyra forritin í virtual umhverfi. Þar sem er unnið mikið með teikningar er gott skjákort einnig eitthvað til að huga að. Sem dæmi má nefna að AutoCAD hefur gefið út viðmið fyrir forritin frá þeim sem hér má finna.