Afar vel heppnaður Súpufundur atvinnulífsins fór fram í DriftEA við Ráðhústorg á Akureyri á þriðjudaginn var, þar sem rætt var um framtíð tæknináms á Norðausturlandi. Um 60 manns mættu á fundinn og skapaðist líflegt samtal um leiðir til að efla námið og hvernig styðja megi við framtíðaruppbyggingu greinarinnar.

Það voru Háskólinn á Akureyri og Háskólinn í Reykjavík sem, í samstarfi við Akureyrarbæ og Samtök sveitarfélaga og atvinnuþróunar á Norðurlandi eystra (SSNE), stóðu að fundinum.

Ásgeir Ásgeirsson, deildarforseti tæknifræðideildar HR, og Ólafur Jónsson, verkefnisstjóri við Háskólann á Akureyri, kynntu námið og Áslaug Ásgeirsdóttir, rektor HA, og Ragnhildur Helgadóttir, rektor HR, leiddu umræðu um framtíð og þróun námsins.

Fundurinn er hluti af áframhaldandi vinnu sem hófst á fyrirtækjaþingi sem Akureyrarbær og SSNE stóðu fyrir í Hofi í febrúar síðastliðnum. Þar kom skýrt fram vilji þátttakenda til að hittast oftar, efla tengsl og bera saman bækur sínar. Súpufundurinn var svar við þeirri áskorun og liður í áframhaldandi samráði og samstarfi í þágu öflugs atvinnulífs á svæðinu.

Nám í iðnaðar- og orkutæknifræði er kennt í staðarnámi við Háskólann á Akureyri og er tæknifræðinám við Háskólann í Reykjavík. Í HA hlýða nemendur á fyrirlestra í beinu streymi á sama tíma og kennsla fer fram í HR. Aðstoðarkennari sér um dæmatíma og aðstoðar nemendur í HA og verkefnafulltrúi í HA heldur utan um nemendur og námið.

Nemendur ljúka lokaverkefni á sjöundu og síðustu önn námsins. Lokaverkefnið byggist á sérhæfingu hvers og eins og það má vinna í samvinnu við fyrirtæki t.d. á Norðurlandi.

Kynntu þér nám í iðnaðar- og orkutæknifræði á Norðurlandi